想升職…點同老細開口傾?【升職前先兆】
已更新：11月22日
打工仔梗係想每年升職加薪！但想升職，唔係講就得咁簡單。除咗要有實力，仲要有啱嘅策略！究竟平時要點樣表現自己？又要點同老細開口傾？
事前有足夠嘅實力!
要有足夠嘅實力，先有資格講升職，唔係靠做得耐，而係要做得醒！有研究指，老細認為打工仔做到2樣嘢，升嘅機會就高好多：
肯承擔唔同嘅工作
肯指導後輩
要升職，就唔可以淨係做自己叻嘅嘢，要肯全方位幫公司。唔理係前線沖刺，定係後勤支援，甚至係幫手影印開會流程，都要唔推肯做，先至突出到自己嘅熱誠同能力。另外，亦要主動提攜下啲後輩，同佢哋分享你做嘢嘅心得，扮演指導者嘅角色。咁樣先可以Show到你嘅大方成熟，老細先會易啲見到你嘅領導才能。
睇啱時機主動出擊!
想同老細講升職，Timing最緊要！記住揀個啱嘅時機，唔好喺忙爆嘅一日，突然衝入老細房話：「有冇時間？想同你傾傾。」或者明知老細心情唔靚，就敲門講「我想升啊!」
幾時先係理想時機？就係喺Office氣氛輕鬆歡樂嘅時候。呢個Moment老細最易話為，你想講嘅野佢都會開心聽下。例如，啱啱趕起個大Project冇咁大壓力嘅時候，或者你簽到單大Deal老細讚你嘅時候。呢啲時候去說服老細，表達你渴望提升待遇嘅心願，最易成功。唔理最後升唔升得成，至少佢都會俾啲時間聽下你嘅諗法，如果第時有升人嘅機會，佢都會第一時間諗起你。
升職要有大局觀!
當你同老細傾升職，千祈唔好用私人理由講自己想升嘅原因。例如話，因為屋企細路要去外國讀書負擔大咗，或者打算買樓所以想搵多啲。雖然呢啲理由好真實，但老細一定唔會想聽。
想升嘅理由唔可以由自己嘅角度出發，一定要企喺公司嘅立場。要講到你可以為公司帶嚟咩好處，而唔係公司可以俾咩好處你。如果凡事淨係幫自己諗，老細會覺得你目光短淺，未夠成熟去做大事。
量化優點證明實力!
時機啱，實力夠，喺老細面前Sell自己，都要靠啲技巧。口口聲聲話自己有幾叻，其實有幾叻？想具體講到自己嘅優點，就要識得用數字嚟表達。例如你跟開嘅Project反應好好，KPI超額完成咗幾多%?
講完過去，就要講下未來。例如你希望下年幫公司嘅營業額增長25%、希望可以出到30個新產品、目標係賣到5萬件衫等等。唔理邊行，老細最終都係睇數字睇盈利。加入數據，量化自己嘅成績，講嘅嘢先至會夠說服力。
守規矩唔越級挑戰!
萬一老細對你嘅升職提意唔理，幾心急都好，都唔好直接去搵大老細，因為越級挑戰可能會有反彈！首先，你嘅直屬上司會覺得你唔尊重佢，唔將佢放喺眼內！大老細都會嚇親，懷疑你地條Team之間溝通係咪有咩問題?
如果今次升唔到，最好嘅做法就係等︰等下次Appraisal。趁機會理性同老細傾下，了解下未升得住嘅原因，再做相應嘅改善……
總之，要升職上位真係唔易，行每一步都要講策略。如果今年有得升嘅話，就認真恭喜你！記得請同事食升職餅，答謝返老細嘅賞識同同事嘅支持喇！
