係時侯轉工嘅5個警號!【打工辭職理由】

喺而家呢個世代，搵工轉工已經係家常便飯。年尾轉工潮又嚟，仲諗緊應唔應該換個環境好？良禽擇木而棲！下面5個轉工原因，中咗就準備遞信啦！

1. 做嘅嘢唔啱自己

有時請人個陣寫嘅工作內容，同實際上要做嘅嘢，可以話差天共地。有人試過見工見Marketing Assistant，話就話負責寫宣傳稿同埋Update公司網站…點知最後成日要Cold Call同去酒會Sell客跑數。

如果份工實際做嘅嘢，係你唔擅長同唔想做嘅嘢，咁就要諗諗係咪要轉工啦！唔好留自己喺一個同自己能力、興趣唔夾嘅環境度，搵份啱自己嘅工作，先至會盡情發揮到你嘅潛能！

2. 公司唔守信用

見工嘅時候，公司可能會應承大家好多嘢。但有時公司方針突然轉咗，或者換咗批管理層，之前嘅承諾就變哂空頭支票。比如話本來話有OT錢，但因為高層變動嘅關係，OT補水計劃可以Cancel冇咗。呢個時候就要諗諗要唔要轉工…唔守信用嘅公司真係做唔過！

3. Team入面「0」尊重

如果喺Office度唔受重視，上司唔識欣賞你，同事又成日搵位笑你，搞到你周身唔自在，其實已經係時候轉工啦！搵工嘅關鍵，係要將自己放喺一個受人重視嘅環境。轉工係踏出第一步，的確唔易。但試諗下，如果仲留喺而家呢個位，缺點多過優點，請問人生又有幾多個十年? 絕對唔應該浪費時間喺一個唔重視自己嘅Team入面!

4. 再學唔到新嘢

有啲Team可能因為同事Nice、做嘢又舒服，令人唔想走，唔會諗轉工換環境。但如果大家對份工已經冇哂熱情，唔會再主動諗橋、諗進步，其實都係時候開始下段冒險旅程啦。

轉工可以俾機會你接觸下新環境，學啲新技能，幫你延長番個職業壽命。唔好等到過咗45歲、唔好彩被炒之後，先至驚覺原來自己當日太求安穩、職場技能儲備太少！

5. 驚番工、情緒健康受影響

如果每個禮拜日晚就開始depressed，一諗到聽日返工就非常沮喪；平時返工，成日覺得好不安，希望快啲收工；另外要去到上司放長假，成Team人先至冇咁精神緊張。呢啲反應實際上係話緊你知，係時候要離開呢個工作環境啦！唔係嘅話，情緒健康遲早出事!