做得出色都要辭職嘅6大理由！【突然離職理由】

有啲老細真係好惡頂，差唔多隔幾個禮拜就要換一批伙記。佢越睇得起嘅伙記，就越快遞辭職信。佢自己就成日怨人唔識感恩，實情喺人地眼中，跟住佢唔走嘅人先至奇怪。打工仔辭職，通常唔係因為公司福利唔夠好，或者做嘢辛苦。因為做嘢再辛苦都仲有啲人肯捱落去，多數走先嘅原因，係睇清楚老細係個點樣嘅人。

1. 用人唯親

如果老細請返嚟嘅人質素參差不齊，睇關係或者擦鞋去提拔，唔係唯才是用，咁劣幣驅逐良幣嘅情況下，手下精兵一定四散。

2. 經常講過唔算數

一個值得尊重同信任嘅老細，下屬都樂意服從。而呢個通常建基喺老細係唔係言行一致、講得出做得到。有啲老細講一套做一套，佢叫你做呢樣嘢，轉頭又唔認數，或者佢答應嘅嘢過幾秒又失憶咁唔記得晒。唔知呢啲老細係有心定無意，但肯定令一啲認真做嘢嘅下屬唔知點樣再跟佢。

3. 當人係機器

番工都係人，冇人希望自己只係一部每日做8-10個鐘嘅機器。人人都希望有人了解、有人關心。如果做老細，除咗指示做嘢之外，冇乜點關心下屬，如果下屬遇到挫折困擾，老細察覺到都冇乜點回應，咁幫佢做嘢仲點會投入到呢?

4. 唔識管理分寸

一個好老細應該要發掘下屬嘅優勢，善加發揮運用。如果老細掛住擺款，限制下屬發揮創意，最後就會激走班有心闖一番成績嘅下屬。不過，如果冇方向、由得同事自己亂嚟，冇適當指導管理，好員工最後亦只會覺到無聊、沮喪、頂唔順辭職。

5. 捽得太盡

有啲老細鍾意集中用有料到嘅下屬，去跟哂啲辛苦、難度高嘅Project。雖則話能者多勞，但冇人會鍾意因為自己盡責，就要做得多過同級同酬嘅同事太多。研究發現，如果每個禮拜超時工作55個鐘而冇額外嘅獎賞，Productivity就會急跌。既然自知做到野，打工仔梗係會離開捽得太盡嘅老細，揾份無咁辛苦或者報酬更高嘅工啦。

6. 俾唔夠Incentives 番工除咗份人工，有時更重要嘅係要成功感同滿足感。有啲老細要求下屬付出多多嘅同時，又唔諗下有乜Incentive Schemes去鼓勵: 出多幾多Bonus? 多啲調下位做下Rotation? 多啲公開表揚下? 打工仔幫佢地做嘢得個做字，實現唔到自我價值，咁就緊係心淡辭職啦。