見工唔識搵Referee好蝕底?【要求Reference Letter Email】

有啲行業，例如銀行、金融、奢侈品零售等，因為涉及到大量客戶嘅個人資料，所以請人時對職業操守非常講究。佢哋會要求Interviewee準備份推薦人名單(List of References)，亦會做Reference Check，即係會問下名單上嘅推薦人(Referee)，了解番Interviewee過去嘅處事方式，同埋核實番啲資料係咪真實可靠。

打工仔要喺HR做Reference Check嘅時候加分，有4點一定要留意︰

1. 事前要得到Referee嘅同意，先可以將Referee嘅聯絡資料交俾公司。唔理呢個人同你老唔老友，都唔可以先斬後奏！

2. 為表誠意，最好親自打個電話或者視像同Referee講明，邀請佢幫你做Reference。咁樣先可以表達返你嘅誠意。

3. 如果想喺公司Reference Check時突圍而出，你可以提前引導Referee回憶下你哋之前一齊做過嘅Project，咁佢喺作答嘅時候就可以舉到具體實例，幫你加分。

4. 唔理最後公司有冇請你，都要記得同Referee講聲多謝，多謝佢哋付出寶貴嘅時間去幫你手。

一定要搵直屬上司做Referee?

如果Interview嘅時候，公司要求你準備份List of References，最理想當然係你最近一份工嘅直屬上司。但有時唔係咁簡單，例如你嘅部門成日換阿頭。咁嘅話，你可以考慮搵其他部門嘅高層幫你做Referee！當然，前提係你喺佢哋心目中有個好印象，咁佢哋先可以喺Reference Check嘅時候，幫你講好說話。

另外，你嘅同事、之前嘅直屬上司、或者同你有工作交流嘅業內人士，只要佢哋對你工作表現同優點有一定了解，都可以成為你嘅Referee。唔一定要揾最近最新嘅前老細幫手，其他合作夥伴都可以係好好嘅選擇。

Fresh Grad點搵Referee?

通常係銀行、金融、教育界同公營機構，先會比較注重Referee同Reference Letter嘅資料。對於剛畢業嘅Fresh Grad黎講，如果申請一啲一般公司嘅一般職位，好多時都唔需要俾Referee嘅資料。但係如果公司要到，一定要寫Referee嘅話呢? 咁系主任、教授通常都係Fresh Grad最理想嘅人選。同學亦可以搵返成績最出色嗰科嘅Mentor做推薦人，咁樣先可以突出番你嘅優勢，評價都會更加正面。

如果有做Internship，咁最理想嘅人選就係做Intern嘅Team Head，或者職位更高嘅Manager。如果想揀高層做Referee，記得係要佢對你有印象，而且係好好嘅印象，咁樣佢先可以喺Reference Check嘅時侯幫你講好說話。