點解見工必問：「你辭職嘅原因係咩？」【見工辭職理由】

見工Interview嘅時候，有幾條問題係「必問題」，但係好多時都唔知點答…

「你點解Quit上一份工？」

「點解而家要搵新工？」

「點解當初離開XXX公司？」

Interviewer總係好想知你Quit舊公司嘅原因。其實咁問唔想刁難你，佢地嘅真正目的，係試探緊呢幾樣嘢：

見工問辭職理由嘅目的

1. 睇你係主動定被動離職

佢地想知你離職係主動定被動︰如果你係因為唔續約或者被炒而離開前公司，係唔係同你嘅表現或者操守有關。如果係咁嘅話，佢地會想聽下你係咪有反思嘅能力，定只係一味推卸責任?

2. 測試你嘅人際關係

佢地想知你同前公司同事嘅關係︰如果你Quit咗之後，都仲同佢地保持良好關係，咁就代表你係一個交際能力都唔錯嘅人。相反，如果佢地知你同前同事關係唔好，咁佢地就會驚請咗你之後，會唔會都對佢地公司嘅人事關係有負面影響?

3. 測試你對新工嘅諗法

佢地想睇你點講對新公司嘅期望，去評估你係咪同公司Value一致︰ 如果你答埋啲嘢同公司嘅方向理念唔夾，佢地就會驚你入嚟之後，會唔會好快都因為對公司唔滿意而又辭職?

見工答辭職理由嘅3大重點

1. 講清楚實際情況，唔好講大話!

無論你Quit嘅理由係咩，答嘅時候一定唔可以講大話。要清楚解釋離職嘅原因，不過你可以用啲技巧，去突出自己嘅優點，令自己喺見工時更加吸引到Interviewer嘅注意。

2. 簡單咁答就得!

除非Interviewer想知多啲細節，否則就簡單清楚咁答佢地嘅問題就得。答嘅時候，盡量保持正面嘅態度，令Interviewer覺得你對之前份工心存感激，同埋對未來嘅新工充滿期待。

3. 對事唔對人!

如果你Quit係因為對之前份工有好多怨言，咁你答嘅時候，就記得咪提前公司嘅壞話。試下用正面嘅角度講番件事。因為Interviewer都會驚，如果俾你入嚟公司之後，會唔會都講公司嘅壞話?

唔同情況嘅答法

1. 因為公司裁員被炒

經濟大環境唔好，好多公司都要Cut Budget、重組、裁員。通常呢種情況同你嘅工作表現冇關。所以答嘅時候，可以講清楚原因，同時強調番自己幫前公司做過嘅貢獻同例子。

2. 希望人工福利高啲

呢個係好多人轉工嘅理由，但答嘅時候唔好令Interviewer有錯覺，誤會你因為之前份工嘅表現唔夠好所以冇升職加薪。答嘅時候，一定要準備合理解釋，點解自己嘅人工應該值得高啲。

3. 希望有多啲發展機會

轉得工都係有上進心、想搵份發展機會好啲嘅工。所以答嘅時候，可以強調番自己希望喺新工嘅成長空間會再多啲。