老細「迫辭」的5個先兆!【辭職先兆】

老細有時真係有啲手段，會用唔同方法將員工邊緣化。好多打工仔都經歷過或者而家都喺經歷緊呢啲苦況：E.g. 升職加薪冇份、被老細當隱形人、被要求進行PIP話要改善表現等等⋯⋯呢啲可能已經係老細出招迫人辭職嘅先兆!

1. 停升凍薪!

打工仔到年尾最擔心嘅就係下年會唔會有人工加同升職嘅機會。可惜升職加薪嘅大權全喺老細手上。如果你5年都冇升過職，加薪幅度又微薄，咁呢啲就可能係老細嘅迫人辭職先兆。

除非金融危機或者公司財務困難，否則呢啲尷尬情況多數係因為老細對你有唔滿意。但老細又未必想做壞人迫你走，唯有希望透過呢個方法令你自己想走，去搵新工。呢啲無聲嘅迫人辭職先兆唔一定好大殺傷力，但係無形中令你被貼上冗員嘅標籤。

2. 直接無視!

每條Team入面，大部份成員都係低頭苦幹型，就算唔係老細「愛將」，正常都會有啲互動交流。如果老細同你幾乎冇互動，開會時直接無視你，從來唔問你意見，有時甚至打斷你講嘢，又從來唔接受你嘅建議…呢種冷暴力唔單止會令你感受到唔同嘅對待，其他同事都會感到啲唔尋常嘅氣氛。

有啲人以為只有被老細鬧先算係被針對，但其實冷暴力更加得人驚。雖然呢啲未算係明顯嘅迫人辭職先兆，但係被削弱存在感都會令你喺Team入面嘅地位變得脆弱，老細都可以借口你工作表現唔好逐步逼你。

3. 評分迫退!

PIP( Performance Improvement Plans）係最毒嘅一招，佢地打著「為你好」嘅旗號，實際上係用黎算計你。PIP通常持續1至3個月，由制訂者制定評分準則去決定員工有冇達到KPI（Key Performance Indicator）。原意係希望指定員工喺一段時間內達到預設嘅評分，從而改善工作表現。但實際上有另一個目的，就係希望令員工知難而退。呢招通常係臨準備炒人前先會用到，好多人投訴過被公司老細用呢個方法「迫辭」，最後因為做唔到Mission Impossible，唯有自己黯然辭職。

4. 狂加工作!

仲有個常見嘅招數，就係老細毫無節制咁加你Workload。你投訴嘅時候，佢可能會話︰「其他人都係咁多嘢做」，唔理你亦冇諗住俾任何Support你。呢招比較激進，所以當事人可能要捱打一段時間。而咁做嘅動機通常係希望你自己頂唔順而提出請辭。不過香港都好多工作狂老細，本身對員工要求極高，恨不得你24小時都係幫佢做嘢。如果老細本身係咁款，又未必係佢想逼你走；但相反，如果佢對其他同事相對寬鬆，咁可能就係老細出招迫人辭職嘅先兆!

5. 明升暗降!

明升暗降係老細玩辦公室政治嘅迫害手段︰架空職能，令你成為有名無實嘅棄將。呢招通常用喺中高層管理身上 ，將本來嘅團隊經理派去開發新部門，表面升高咗個位，但實際上新部門冇成員冇下屬。口口聲聲話係Start-Up階段，實質上就係抽空權力，令當事人喺冇支援嘅情況下難以交出成績，甚至令佢覺得冇動力而提出請辭。