由辭職信到散水禮物6個注意事項💢【辭職心理戰】
已更新：11月13日
遞大大封嘅辭職信之前，梗係要諗下同老細「攤牌」嘅場面啦！有啲人希望老細加人工留自己；有啲人希望老細輕輕放過。唔理點，同又愛又恨嘅老細較勁，梗係要有好好心理戰準備，唔好臨門一腳先「撻Q」！
1. 唔好只用email遞信 既然話要遞辭職信，當然要整一封簡單明瞭嘅「真」紙信啦！唔好懶惰淨用Email、Whatsapp就當畀咗！要鄭重其事，面對面同老細講要離職，然後禮貌咁遞上「真」信封！
2. 切忌妄想「箍煲」
有啲人明明已經決定咗要走，但又諗公司為咗留住你可能會提出加人工嘅條件…唔好再諗住佢哋會勸你留低返轉頭啦！呢種「箍煲」嘅妄想，真係唔好多心試！既然決心要換個環境，點解仲要咁猶豫？咁拖泥帶水呢？
3. 避免同老細講敏感話題
唔好當面問佢哋打算請邊個嚟代替你嘅位置，亦唔好話比老細知邊間公司用幾多錢嚟挖你角。照平日番工咁就好，保持番啲距離，唔近唔遠就最好。
4. 切忌臨尾放飛自我 唔理你對公司有幾大怨氣，如果之前都可以忍一時風平浪靜，點解最後一刻先放飛自我呢？攪得太難睇，最後只會變成大家嘅笑話。事實係點，心知肚明就夠啦！照保持番個份風度囉。
5. 唔好忽略工作交接
要俾人睇你係個負責任嘅人，最好主動出聲，講出工作交接嘅大計啦！唔好怕煩，先整理好手頭上嘅工作，約埋老細同相關同事開個細會議，好好交代下未完成嘅Project，盡量配合交接嘅工作。唔好等人催，不妨主動啲，展現你嘅專業精神！
6. 細心準備散水禮物
揀番適合同事嘅散水禮物，留意下同事嘅喜好同興趣。如果佢係個愛飲茶嘅人，就可以揾啲特色嘅茶葉或者茶具。可以考慮喺散水禮物上面加張手寫嘅祝福卡，寫低你對佢嘅感謝同祝福字句。最後，要送得夠驚喜！可以揀一個適合嘅時機，例如Office Lunch或者Farewell Party，喺大家唔知情嘅情況下，突然拎散水禮物出黎送俾同事。咁樣可以令佢哋更加驚喜同開心，留番個大方、識做嘅印象喇！!
