星期日Last Day又得?計錯Last Day蝕人工! 【辭職日計算】

打工仔總有諗辭職嘅一日！但原來辭職日計算都有好多學問，唔小心計錯咗，仲可能蝕錢收場！首先要知，辭職嘅第一步係要遞信，咁Last Day應該寫邊日呢? 同Effective Day 又有咩分別?

Last Day vs Effective Day

其實Effective Date同Last Day好似，只係相差一日。Last Day就係你最後一日返公司嘅日子，而Effective Date就係Last Day嘅第二日。換句話講，Effective Date就係你離職生效嘅日子，呢一日你就唔使返工啦！

咁辭職信應該寫Effective Date定Last Day呢？其實兩個都得，可以揀其中一個去寫。

唔同公司Last Day辭職日計算方法可能有啲唔同，有啲公司會按照實際工作日嚟計，但一般嚟講，公司通常都以月份嚟計通知期。除非你嘅僱傭合約有明確規定，一般通知期都至少係1個月。

按月份計算辭職日

其實好多公司都係以月份嚟計通知期，咁就方便好多。按照《僱傭條例》，如果以月份計，通知嗰日就係計埋入通知期度。咁你可以參考以下3個示範嚟計辭職日︰

1. 下個月同一日嘅前一日：E.g. 2月13號遞信，咁Last Day就係3月12號。

2. 如果下個月冇同一日，咁就計到去下個月嘅最後一日：E.g. 1月30號遞信，但2月冇30號，咁Last Day就會係2月最後一日，即係2月28號或者2月29號。

3. 如果你係喺一個月嘅最後一日發出通知，咁就要計到去下個月嘅最後一日：E.g. 2月28號或者29號遞信，咁Last Day就會係3月最後一日，即係3月31號。

Last Day可以寫星期日？

其實如果你係五日工作週，而且按月出糧嘅話，星期日都可以係有薪嘅！所以好多打工仔都會好醒目，安排自己嘅Last Day喺星期日，咁就可以「賺」多兩日人工啦！