4招把握黃金辭職時間!【辭職時機】

打工仔要開口同公司講辭職，就好似情侶要開口講分手一樣。職場好細，唔知第日會唔會返番舊公司，或者再見返舊上司舊同事。記住，辭職要有交帶，凡事留一線，日後好相見。所以，點遞信、幾時開口都好有竅妙！

1. 邊日遞信最好？

除非有迫切原因，否則辭職時間最好避開Peak Season。如果公司而家好忙或者你跟緊個好重要嘅Project，建議你等Peak Season過左再遞信。咁樣可以減低對公司同事嘅影響，避免留低負面印象。

2. 邊個時間辭職最好？

唔好以為揀定一個日子遞信就搞掂算數，其實辭職時間都好有學問。建議可以先了解返你上司當日嘅行程，睇下佢有冇會議或者其他重要事，盡量避開佢忙嘅時段。你可以喺當日朝早同上司約定一個時間傾計，咁樣佢就有定心理準備，亦唔會攪亂佢嘅工作。

黃金時間係下午4至5點左右，因為呢個時間就收工，你同上司傾完計就可以收工走人，畀時間佢消化你辭職嘅消息。同時都可以避免尷尬，輕鬆離開公司。

3. 辭職信要俾邊個？

為咗表示尊重，你應該最先交辭職信俾你直屬上司。如果俾大老細或者HR知道你辭職嘅消息先，都會顯得唔尊重。

4. Send辭職Email定係交辭職信好呢？

同上司傾計嘅時候，你可以Print 定一份辭職信俾佢。不過為咗保障自己，傾完之後，記得再補一封Email俾上司，仲要CC副本埋俾HR，咁樣就可以避免之後出現任何溝通誤會嘅情況。即使對公司同上司有怨言，都唔好公開啦。遞信嘅時候，應該向上司講返幾句感激嘅說話，盡力做好交接。同舊公司好嚟好去，唔好留低負面嘅印象。