公務員辭職前必讀!【辭職的勇氣】

公務員係好多打工仔夢寐以求嘅鐵飯碗，故坊間就有欣賞公務員辭職的勇氣之說云云。不過有啲公務員亦會因為各種原因而辭去公職，呢篇文就講下一啲公務員嘅辭職需知。

公務員寫辭職信要留意咩？

1. 唔需要寫明辭職理由

雖然辭職背後肯定有原因，但係寫信嘅時候絕對有權唔寫，唔一定要坦白寫出嚟。如果唔想透露，可以簡單咁寫Personal reasons，雖然唔係好明確，但都算係交代咗。如果係因為健康或者家庭原因而要辭職，而又唔介意透露嘅話，可以用Health concerns或者Family issues嚟輕輕帶過。

如果同上司關係好，相信對方都會同你傾吓計。當面同對方講明原因會直接啲，大家有交有流會好啲。公務員體系好大，呢封辭職信係用嚟做Record，上司收到信之後，要轉交負責HR嘅公務員手上。過程可能經過好多人，所以詳細私事冇需要俾咁多外人知。

2. 盡力幫手過渡

辭職信Last一段，通常會表示你願意好好埋配合交接嘅程序。呢個係上司最重視嘅部分，因為新人接替你個位，未必即刻適應得好。如果你主動提出會幫手交接，上司自然會更加舒服放心。

3. 咪用辭職信發洩

有公務員會因為政見或者觀點唔同而辭職，或者對部門、上司嘅做法不滿。但係寫信嘅時候，千祈咪長篇大論批評部門或者上司，甚至大談自己嘅理想，搞到辭職信變成發洩工具。

辭職信最重要係簡潔，千祈咪變成一個發洩平台。你寫嘅批評同觀點，其實冇人會詳細研究。寫咗都白寫，但係會留低個污點。

4. 要正面表示感激

無論你辭職嘅理由係咩，你嘅辭職信都要寫得正面。即使因為人事問題或者對工作唔滿意，都唔應該流露出負面情緒。因為如果唔係即時離職，上司可能會刻意喺通知期內制造麻煩俾你，對你絕對冇好處。所以，辭職信一定要充滿感激同正面嘅語氣。

喺寫明辭職同最後工作日之後，通常會有段用嚟感謝上司或者部門俾你嘅機會同指導。要表達出你為團隊工作感到榮幸同感激。咁樣上司睇到就會舒服啲。

公務員辭職前要考慮咩？

公務員試用期長，要3年先可以拎到長合約。如果決定辭職，首先要知道自己嘅通知期有幾長。可以睇番你嘅合約，裡面會詳細寫低。一般嚟講，如果已經過咗試用期，成為正式公務員，辭職通知期就會係3個月。但係如果未過3年試用期，喺呢段時間內辭職，通知期一般唔會超過1個月。當知道左自己有幾長通知期之後，第一樣嘢就係要計返自己嘅最後工作日，因為辭職信一定要寫明呢個日期。

不過，如果決定即刻離職，當然要喺信度寫明，但要有心理準備，無論過咗定未過試用期，都要向政府支付1個月嘅代通知金。