辭職預早放風嘅3大好處?【辭職開場白】

辭職嘅理由好多，大部份打工仔辭職，不外乎為咗轉工、進修、創業、移民、唞番陣等等…有心辭職嘅職場高手，不妨適時試下一招︰預早放風講定辭職！

唔係呀嘛？辭職都可以預早放風講定？冇錯，不過呢招只限於你同公司老細關係超好嘅情況下先可以用！呢招除左可以適時「善意提醒」下公司之外，仲可以幫自己爭取到更多機會

1. 睇吓公司內部有冇其他位啱你

如果公司規模大，即使而家做緊呢個崗位唔啱你，都總會有其他部門嘅位啱你心水。有時高層知道嘅內幕消息多啲，佢地或者可以幫到你安排。加上如果高層願意推薦你去另一個部門，成功機會亦都更高，可能可以喺HR登招聘廣告之前，就搶到呢個職位空缺。

2. 畀老細知，睇下可唔可以一齊拆掂啲問題

如果你同公司嘅關係不嬲都好好，而你預先放風話打算辭職，有心留你嘅老細實會搵你傾下，聽下有咩令你想走嘅難題，睇下可唔可以幫手拆掂佢。呢個時候就係直接同高層溝通嘅好機會，你可以同老細傾下你遇到嘅問題，例如想升職、希望有更多發揮空間（當然要事先評估返自己夠唔夠資格），試下老細肯唔肯幫幫你——因為有啲問題真係得高層先拆得掂。如果問題拆得掂，咁就好，唔洗寫辭職信。但如果高層話幫你唔到，咁就更加明確，得番辭職呢條路。起馬可以令你破釜沈舟，走得更放心。

3. 畀時間公司揾啱人，交接順利啲

如果已經下定決心要走，你都唔想一走左之後，公司部門就亂哂大龍。所以，預早同老細講定要走，俾多啲時間公司請啱人去填補番你嘅位置。如果公司唔想請新人，佢哋亦有足夠嘅時間去安排其他同事去接手你跟緊嘅Project。咁樣就可以確保工作交接順利進行。