辭職常犯嘅7大錯誤!【開口講辭職】

開口講辭職係打工仔嘅重要時刻，好多人諗起都緊張。為咗令一切順利啲，以下提番啲成日辭職時無意間會犯嘅錯，希望預先幫到大家避免中招!

錯誤1：冇同直屬老細講聲先

開口講辭職，第一個一定要同你直屬老細約個時間講左先！HR或者其他大佬嘅會議，可以之後再搞。冇咁做嘅話，好可能會搞衰你同老細嘅關係。記住，開口講辭職嘅次序好緊要，千祈唔好比其他人知道先。因為將來其他公司問你要推薦信嘅時候，第一個你需要嘅係你直屬老細。

錯誤2：冇約個正式Meeting

一定要同你老細約個正式Meeting。最緊要係，咪喺佢兩個忙到爆嘅大會之間，插你個Meeting入去…要俾佢明白同你呢個Meeting都好緊要，要同佢講︰「我真係有啲重要嘢要同你傾下」。

錯誤3：未收到新Offer就開口

如果你要跳槽去另一間公司，最緊要就係，等你手上有簽咗字嘅Offer先好開口講辭職。一旦簽咗Offer，你就唔洗再等，可以開始通知期。同時，而家嘅公司都可以喺你嘅通知期內，唔再搵你做新Project。

錯誤4：未口頭傾就正式出信

如果你想同老細關係保持良好，最好喺寫正式嘅辭職信之前先口頭傾吓。一黎就出正式嘅通知信太過激進。簡簡單單出封有Receipt Request嘅Email就夠啦。

錯誤5：冇保持態度中立

喺你開口講辭職嘅時候，要保持番一個中立嘅態度。可以講下自己嘅打算同自己嘅情況，但要以理性溝通為原則。開口講辭職嘅Meeting，唔係搞批評嘅地方。即使你個老細扯哂火，記住，你都要保持番冷靜同專業。

錯誤6：解釋太多

辭職係一個好大嘅決定，你要為你呢個決定負責。你要肯定自己嘅決定係啱嘅，最緊要係，唔可以俾老細影響到你。喺你開口講辭職嘅時候，唔駛道歉。如果老細問你係唔係會去對手間公司，唔駛答返佢。記住，辭職係你嘅權利!

錯誤7：左搖右擺

你老細可能會有好多唔同嘅反應。所以要事先諗下點樣應對可能出現嘅問題，唔好俾佢哋攪到你措手不及。咁樣可以幫助你保持冷靜啊。如果老細想留你，你要保持專注一致，堅持番自己嘅決定，亦唔駛指責同評論。辭職係一個大決定，所以真係要準備好先去馬。唔好開口講辭職嘅時候，仲諗住公司會留你。