如何跳槽而不失優雅專業? (下)【開口辭職】
已更新：11月13日
上篇講到宣布辭職後，點面對同事老細嘅各種反應... 呢篇嚟到Exit Interview點準備？如果公司挽留又點決定?!
第五步：應對Exit Interview
有啲公司會搞Exit Interview離職訪談，想知道你對工作嘅意見同埋有咩可以改進嘅地方。咁點樣準備呢個Interview呢？
1. 坦誠又有風度
同佢哋分享你對公司嘅感受，但唔好過份批評或太負面。可以提供有建設性嘅意見同埋改善建議。
2. 講具體例子
喺發表意見嘅時候，講返具體例子或者情況，唔好亂咁一概而論。咁樣佢哋會更易明白你嘅觀點同埋識別出需要改進嘅地方。
3. 保持專業
將Exit Interview睇做一個專業嘅對話，整個過程都要保持尊重嘅態度。
第六步：應對公司挽留
記住，即使公司對你挽留，通常都唔會解決到令你想揾新工嘅根本問題。而一旦試過開口辭職、表達過你喺公司嘅唔開心，你嘅忠誠度就會備受質疑。到未來升職嘅時候，老細會記番起邊個係真心對佢忠誠…而當公司要炒人嘅時候，你亦可能第一批受影響。
有統計話，90%嘅人接受公司挽留之後六個月都會再辭職。如果要以威脅辭職，公司先識得認可番你嘅專業價值，咁就要好好諗下呢間公司仲係咪值得留?
接受公司挽留可能會俾人覺得唔知自己想要咩咁。而且知道自己俾金錢影響左自己嘅判斷，點都會有啲迷失嘅感覺。你可能會問點解老細之前冇早早加你人工呢，可能佢覺得你唔值…咁佢而家加俾你，可能只係暫時留住你，等佢有時間揾到頂替嘅人。
第七步：維持好職場關係
轉工唔代表要同你公司嘅朋友斷絕來往。開口辭職之後要點樣喺保持番職場關係?
1. 開心離職
努力用正面嘅態度離開，表達對公司嘅感激同埋提供過渡期間嘅幫忙
2. 保持聯繫
喺專業社交平台，例如LinkedIn，同你嘅同事上司保持聯繫。呢啲聯繫將來可以俾到你更多機會同專業意見。
3. 參加Farewell活動
如果你嘅團隊搞咗個Farewell Gathering，請務必出席。亦可以請番同事食散水餅，或者準備啲散水禮物送番俾同事，表達對佢地支持嘅感激。
4. 保持聯絡
定期同你嘅前同事保持聯絡，了解番佢哋嘅職場進展，同佢哋分享你自己嘅經歷。保持呢啲聯繫可以帶黎寶貴嘅社交機會同埋職場意見。
總結，開口講辭職係一個好感性嘅挑戰，不妨跟住呢個攻略，就可以確保過渡順利，轉工而不失優雅專業！
即刻睇番︰
