老細唔會同你講，鍾意份工都要辭職嘅6大理由!【離職考量】

有冇諗過離開而家鍾意嘅呢份工？原來唔止你一個會咁諗！根據勞工處嘅數據，打工仔平均一份工做4年就會去揾下份更好嘅。可能你好鍾意而家份工，但係又擔心自己留喺同一個崗位上太耐，變得Outdated。或者你嘅工時太長，或者番工放工時間辛苦。即使你鍾意而家份工，有啲時候，離開嘅原因會比留低嘅多…以下6個離職考量，話你知係時候要諗諗轉工?

1. 想多啲Work Life Balance

份工有冇搞到你冇哂時間生活？可能你要家庭、工作兩邊兼顧。或者你撘車番工嘅時間太長，全日時間俾哂份工，冇得做鍾意做嘅嘢、追求其他興趣。呢啲都係一個信號，話你聽應該揾份更適合而家生活狀況嘅新工。

2. 想轉下環境

可能你想搬番近啲屋企人，或者搬去個唔同嘅地方。或者你已經厭倦咗市區嘅生活模式，想試下節奏慢啲嘅生活環境（或者相反）。呢啲都係好好嘅離職考量，值得你諗諗揾機會轉工。

3. 想行得再遠啲

呢份工係咪已經行到盡頭，冇得再俾你發揮？如果係嘅話，有兩個選擇︰如果仲鍾意份工，對事業嘅發展冇咩更高嘅期望，可以長留喺度。或者可以考慮揾間有更多發展機會同空間嘅新公司。

4. 係時候試下其他嘢

可能你就到退休嘅年紀，想趁仲有時間，探索下其他事業路向。有冇啲嘢係你仲可以做、仲想試下嘅？鍾意你份工唔代表一定要Keep住做。當你仲係細路嘅時候，有啲咩想做？試吓做啲Career Test，睇下有啲乜新機會。重頭黎過永遠都唔怕遲。

5. 想升得快啲

係咪覺得自己嘅仕途停滯不前，冇乜點升？或者原本以為會升，但結果升唔成？如果覺得呢間公司嘅未來唔係你期望咁樣，咁就係時候考慮揾揾其他新工。記住，睇下有咩新機會，有咩其他嘢可以做，絕對冇壞。

6. 想多啲錢

最后轉工嘅原因當然係多啲錢啦! 即使你好鍾意而家份工，但如果每個月都要煩惱交租、交水電煤、收入唔夠用，都好大壓力！