top of page

你係咪跟緊個變態老細?認住呢8個徵兆!(上)

做野遇著個變態老細真係好難頂,有時仲唔係咁易察覺原來自己跟錯人!衰老細有好多種,但最明顯嘅特徵係:唯我獨尊、控制狂、對員工有唔現實嘅期望、玩政治、同唔信任下屬!


唔係話所有難搞嘅老細都係變態,有啲老細只係管理技巧未成熟,有待改進。而變態老細,佢哋嘅個性同態度先係造成佢哋領導風格混亂嘅原因!


8個明顯嘅變態老細徵兆:


1. 會將你嘅功勞當佢自己嘅

衰老細好少會認可你做嘢做得好。佢哋只視員工為佢哋自己嘅工具,而唔係獨立嘅個體。所以當有嘢做得好,佢哋攞走全部功勞。喺佢哋心目中,員工只係代表佢執行指示。


不過,當有嘢出錯嘅時候,呢個規則就唔再適用!佢哋唔會承擔責任,而且通常會追問係邊個做錯。就算佢心知自己領導失誤,佢都會迅速否認,將自己嘅錯投射喺團隊上。


2. 用恐懼控制你

衰老細最驚失去控制,所以佢哋會試圖用恐懼威嚇你,迫你順從佢哋。佢哋可能會威脅你嘅工作或聲譽,如果你唔聽佢指令。佢可能會試圖剝奪你嘅權力同權威,好似要強調佢先係大佬。衰老闆最驚有人有比佢更大嘅權力,呢個係佢絕對唔會容忍嘅事。


3. 佢哋好自大,自以為是

變態老細自視甚高,佢哋認為自己比其他人更聰明,而且無論對錯佢哋都會覺得自己係啱。佢哋覺得自己比身邊嘅每個人都出色,特別係屬下員工。所以呢啲老細身邊通常會圍繞住一班應聲蟲,去幫老細做哂啲嘢,而老細只需要做啲簡單決定,根本唔理解事情背後點樣運作。


衰老細從來唔會將人地嘅批評當成一種建議,佢哋覺得批評係對佢自尊嘅攻擊;佢哋唔會聽員工嘅建議,而係會立即進入防禦模式,視呢個討論為一場權力鬥爭。


佢哋嘅自大感,加上對批評嘅高敏感度,通常係最明顯嘅徴兆,跟着呢啲老細一定會好辛苦 ─ 所以要密切留意呢啲行為!


4. 佢哋好鍾意否認事實

「否認」係一種防衛機制。實際上,否認事實係人性對抗焦慮同憂鬱嘅心理防線。所以當你同一個人打交道,佢對某樣事實有否認嘅態度,意味住佢可能唔係純綷固執,而係佢未有辦法處理某啲感受。


咁唔代表要同情衰老細!不過,明白佢哋嘅行為背後更深層次嘅問題,可以幫助你減輕憤怒,理性咁諗:有冇嘢你可以做去改善呢啲情況?抑或佢哋太過自大?如果係後者,或者真係要好好諗定新嘅職涯計劃,揾定間好啲嘅公司啦...


(待續 - 極品老細嘅行為點止呢啲,Follow我地,睇埋另外4個變態老闆徵兆!)


20 次查看0 則留言
bottom of page