top of page

同老細傾人工嘅7大常犯錯誤

見工同未來老細傾人工,對大多數人嚟講係件好尷尬嘅事。有啲人怕要求得太多會冇咗份工,要得太少又會Underpaid。如果見工傾人工時唔夠知己知彼,又中埋啲常犯錯誤,長遠可能會令打工仔蝕好多錢!


1. 一開始就問人工問題

冇嘢比喺一開始見工就問人工更令老細反感。當然,早啲問呢個問題有其道理…連人工都唔夾就唔好嘥大家時間啦。不過如果夾硬一開始就問嘅話就係見工大忌!要俾啲耐性,如果公司對你有興趣嘅話,關於人工問題嘅部份始終會出現。


2. 講太多個人財務狀況

老細未必太關心你個人嘅財務狀況,亦未必關心你想搵到幾多錢嚟維持生計。假設諗住同老細講因為有大筆按揭要還,希望傾到高啲人工,多數都無乜用。任何時候都要保持返專業,將重點放喺工作職責、Market標準同你嘅資歷上。


3. 主動提出具體人工

喺傾人工嘅過程中,第一個提出具體數字嘅人會處於被動劣勢。如果咁樣做,就等於話比對方知你嘅底線係邊度。如果老細問︰「你期望嘅人工係幾多呀?」,試下反問返︰「我對呢個職位有興趣。係咪有Set好嘅人工範圍?」 但要小心,如果呢種問答反覆來回太耐,可能會令人反感。如果佢一直追問你嘅期望,咁就要準備講到一個人工範圍。


4 諗住仲有好多談判空間

除非未來老細超冇良心,否則可以假設佢提出嘅人工,已經係合理範圍之內,符合佢地認為呢份工嘅價值,或者佢地負擔得起嘅Budget。


所以,雖然你可以試下稍微要求調高人工,但可能都係5%至10%嘅範圍之內。而有啲情況下,根本冇談判空間。例如好多NGO嘅Budget其實睇得好緊,即使個applicant超水準,佢哋都冇辦法出得太高嘅人工。


5. 淨係掛住計底薪

好多人傾人工時,往往淨係掛住計底薪而計漏數,其他嘅福利 - 退休金、會籍、停車場同其他額外好處嘅價值就冇理到。實際上,一份底薪係$20,000嘅工,當考慮埋所有因素之後,其實際價值可能會超過$30,000。記住要諗「總人工」嘅問題!


6. 即場接受Offer

即使個Offer比你原本要求嘅多,都唔應該即時接受。如果你即場接受,可能會俾人一份衝動而又唔講究嘅印象。一份Offer係一份重要文件,因為佢會變成你同公司之間嘅Contract。所以即使老細想快啲得到答案,你都應該要冷靜再諗諗。大部分公司都會俾合理時間去決定。


7. 以為日後追得返

喺打工生涯當中,接受一個「低過預期」嘅人工係會付出高昂代價。


假設有兩個人,35歲,一個起薪$50,000,另一個起薪$55,000。雖然開始嘅差距唔大,但如果假設佢哋嘅薪酬每年增加3%,由於複利效應,第二個人喺打工生涯當中將會多賺$238,000!



12 次查看0 則留言
bottom of page