如果你想喺2024年實現某啲職業夢想，單靠列出你嘅新年目標係唔夠㗎！好多目標就只係寫係度，然後一年過去先發現乜都冇做！因為環境會充滿變故 ，工作亦可能越來越忙，最後就好容易失去動力。所以，點樣設定目標先至真係有用呢？
無論你追求咩目標，例如報讀培訓課程、提升領導技巧、或者諗住升職、轉工，都要設定好目標去追求先至可以實現。呢啲目標最好遵從「SMART」框架：
SMART即係具體（Specific）、可量化（Measurable）、可達到（Achievable）、有相關性（Relevant）同埋有時間限制（Time-bound）。
你而家嘅新年目標係唔係符合呢五個準則呢？
1. 具體（Specific）： 搞清楚你嘅新一年目標
明確咁定義追求目標涉及咩人物、做乜嘢、喺邊度做、同點解。太模糊嘅目標，例如「我想升職」，就唔夠具體到令你有動力追求喇。搞清楚追求目標所需嘅人物係邊個（係你自己？ 定同你經理講下？）、想要咩嘢（升職做部門主管？）、喺邊度（喺而家嘅公司定係其他公司？），最緊要嘅係點解（為家人帶好嘅生活？追求你嘅passion?），咁樣先可以推動你去實現目標!
2. 可量化（Measurable）：你嘅目標係咪度量得到？
下一步就係搞清楚點樣追蹤進度同埋量化成功。當你設定可量化嘅指標後，呢啲指標唔止可以話比你知係咪行緊啱嘅方向，更會幫你將計劃分解成細微嘅步驟，咁就唔會因為終極目標太遙不可及而太大壓力。
舉個例子，如果你嘅目標係喺年中前提升KPI，你可以同經理每個月嘅一對一會議度睇報告，用嚟衡量自己嘅進度。例如目標係喺二月份爭取「好」嘅評級，四月份爭取「非常好」嘅評級，六月份爭取「卓越」嘅評級。咁樣就可以一步一步達到目標啦！
3. 可達到（Achievable) ：你嘅目標可唔可以做得到？
有時我哋對新一年開始感到好期待，會太過樂觀興奮，結果設定咗一啲唔現實嘅目標，最終反而會阻礙進展。你嘅職業目標應該係一個挑戰同埋現實嘅結合 — 有足夠嘅挑戰性，可以推動你離開Comfort Zone，做一啲同平時唔一樣嘅嘢，但同時又唔可以難到令你無從下手！
有時啲目標可能係你能夠做到嘅，但設定嘅時間唔夠現實，或者你而家根本未有足夠嘅資源去做。如果係咁，就要相應地調整下啦。
所以，「我想喺兩個星期內完成一個300小時嘅課程」，咁太誇張啦！可以按照自己嘅進度，「每兩個星期完成一個單元，然後用六個月時間完成整個課程」，咁樣就可以配合返你嘅工作時間表。慢慢黎，就一定可以做到㗎啦！
4. 有相關性（Relevant)：啱嘅目標先去做
你嘅目標同你整體嘅職業規劃、專業有冇關聯呢？如果你嘅目標唔係符合你五年或十年後嘅夢想位置，咁設定嘅目標就冇乜意義啦。目標應該係你自己真心渴望同埋對你生活有意義嘅，唔係其他人俾你嘅期望。如果你自己都冇心機，又點會有動力去做呢？咪浪費時間啦，搵啱嘅目標去追求啦！
5. 時間限制（Time-bound）：設定有時間限制嘅目標
如果你冇為自己嘅目標設定時間框架，就好大機會拖延唔做，仲會令你嘅老闆、同事覺得你嘅目標模糊，唔會認真對待你。所以，唔好只話「我嘅目標係主持更有效率嘅會議」，而要話「我嘅目標係我主持嘅所有會議都唔可以超過30分鐘，包括要有action plan」。或者，唔好只話「我想升做Sales Manager」，而係講：「我嘅目標係喺2025年1月之前晉升做Sales Manager」。咁樣先係明確嘅目標！
Comments