搵新工時好易會懷住無比興奮嘅心情去報、去accept個Offer…然而一但入咗新公司之後情況不如預期，又會感到中伏、失望。有啲情況，公司嘅伏位好明顯，但有啲時侯就冇咁易察覺。如果喺Interivew已經早早察覺到一啲「伏味濃」警號，咁搵啱工嘅機會就會大大增加！
新工「伏味濃」警號1︰請人過程混亂不堪！
交咗Application、CV之後，請人過程就正式開始。喺Interview之前同期間，有啲嘢應該要有條有理咁進行，可惜嘅係，並唔係間間公司都安排得咁周到！
班老細梗係希望Candidate要做足100分，但其實佢地自己都應該要做好準備…如果班老細喺Interview遲到、冇睇CV、冇睇Job Description、又答非所問，咁呢啲都係佢地公司唔多掂嘅「中伏」警號！如果連老細自己都表現得咁唔專業，令到成個請人過程混亂不堪，咁呢個時侯「止蝕離場」或者係最好嘅辦法！
新工「伏味濃」警號2︰面試官回避問題！
據統計，最多有40%嘅僱主會喺Interveiw時老作講大話！
Interview通常都會鼓勵Applicant問返面試官問題。如果面試官對於份新工嘅職責內容含糊其詞，可能反映佢哋連自己都未搞清楚想要啲咩類型嘅員工。如果見工個陣覺得班面試官含糊，不妨追問多幾條問題，搞清楚個情況。如果班面試官意圖回避問題、或者唔同人答唔同答案，咁呢啲都好可能係份新工「有伏」嘅警號！
新工「伏味濃」警號3︰經理同員工人事變動不斷！
一間公司如果要經常換人，咁可能公司方面係有啲問題。可能係公司對員工唔好，工作環境Toxic，或者容易捽員工捽到Burn Out！所以，喺accept一份新工Offer前，不妨收下風，了解下佢啲舊員工點解會辭職！
新工「伏味濃」警號4︰刻意拖長請人過程！
如果個請人過程一拖再拖長，要小心，因為可能係公司未肯定要唔要請人，猶豫不決緊，想暫時Hold住個Applicant，等有個「更好」嘅人出現。如果係咁，可以諗定去搵另一份新工啦！
新工「伏味濃」警號5︰面試官對人唔尊重！
班面試官點同你介紹佢地自己公司班經理、同事? 聲氣係點？有冇講八卦嘅感覺？
如果係一組面試官Interview你，佢地喺過程中有冇彼此唔尊重? 或者語帶傲慢嘅感覺？有冇亂七八糟咁亂嗡？任何唔尊重嘅表現都係一個警號，表示呢間公司唔係理想嘅工作場所！
新工「伏味濃」警號6︰面試官闊佬懶理！
面試官係Applicant接見公司嘅第一印象代表，所以不妨留意下佢地嘅投入程度。如果班面試官冇乜出聲、避開眼神接觸、掛住望手機或者一副冇乜興趣、例行公事咁嘅樣，或者代表佢地有意無意傳達緊個訊息︰其實呢份工佢地已經請咗其他啱嘅人啦！
新工「伏味濃」警號7︰面試官談及不當話題！
如果面試官講到任何種族主義、性別歧視、年齡歧視或其他形式嘅歧視行為，唔單止要走，仲要跑走！僱主要遵守平等就業機會嘅相關法律要求。佢哋冇權問有關種族、宗教、婚姻狀況、懷孕或者殘障等等嘅問題。單單喺面試過程中出現一兩次呢啲行為，就足以代表呢間新公司好有問題！
Comments