top of page

新年搵新工!3招對付「惡頂上司」!

已更新:2月17日

大部分人做嘢都一定遇過惡頂上司!未必全部衰老細都係壞人,有啲可能只係冇自知之明,又冇人提點過佢地。不過,有啲老細就真係自大、死要面,甚至有病態嘅自戀傾向…


對住呢啲極品老細嘅時候,關鍵係要識得點樣Set返個明確嘅界限,同埋管理返佢地嘅期望。如果唔咁做,或者對方根本唔聽,咁你就搵過份更好嘅工啦!


衰老細有樣睇?

首先,要識點樣分衰老細 - 佢地嘅期望,往往遠超員工嘅合理工作範圍!


好多人,特別係啱啱入行嘅時候,唔識睇佢地老細有問題。例如,有冇被要求24/7隨時覆電話、WhatsApp 同埋Email?入職嘅時候,有冇講過會有呢啲情況?非工作時間內冇回應要求,又係唔係要硬食老細嘅批評?問題係,一旦默默忍受,老細對你嘅期望就只會越嚟越高。呢啲明明係額外嘅責任,就會逐漸變成你「日常」工作,最慘嘅係佢唔會補番OT人工俾你!


好多人都比較隨和、唔想得罪人,咁就特別容易跌入呢個圈套。本來只係希望做好自己嘅工作、留下好印象,結果就孭咗一堆超出工作範圍嘅責任。硬食超時、超負荷,又未必敢出聲,怕老細失望或者怕顯得冇承擔……久而久之就失去埋對份工嘅興趣。


搵新工嘅時候,表達期望都好重要,要喺一開始就問清楚佢地要求做啲咩。如果份新工一開始冇講清楚職責內容,呢個可能係俾機會衰老細作惡嘅先兆…只要佢想,就可以隨時改變你嘅工作角色。所以無論點都好,都唔好怕去追問、澄清你嘅工作內容具體包括啲咩!


要堅守set好嘅界線!

花少少時間諗下自己願意忍受啲咩,可以先將界限設定係工作範圍內,然後再進行微調。


例如,如果工時係星期一至五朝九晚五,咁呢啲時間之外,唔需要花時間處理工作事務。當然,如果真係有緊急需要嘅話可以幫下手,但係雙方都應該明白,呢係個你嘅善意,而唔係「老馮」!


重要事情講多次!永遠係隨和嘅人最易中招,因為佢地怕被討厭,又怕衝突,通常會默默接受要求。表面上「唔好惹麻煩」,最終都難免會感到不滿、唔受尊重。所以,學識喺需要嘅時候堅定而專業咁Say No,係非常重要!


一啲特別衰嘅老細,佢哋會好識Spot啲少講「唔得」嘅人,然後利用佢哋嘅善良。有時唔止係工作時間以外覆email咁簡單,衰老細仲可能會逼你做啲違反公司政策嘅事。對付呢啲情況,最好嘅方法就係再次直接講︰「唔得,我做唔到!」,如果需要嘅話,再解釋返點解唔得,例如,因為違反咗公司政策,或者呢啲唔係我嘅職責範圍!


如果衰老細唔接受你嘅拒絕,甚至試圖令你覺得自己無能或有罪疚感,咁就要認真考慮呢種老細仲值唔值得跟落去!


同衰老細Say NO!

同衰老細講嘢嘅時候,要盡量講清楚,唔好轉彎抹角,亦唔好用太客氣嘅方式表達。如果你對某件事唔開心,就直接講出黎,唔好淨係暗示。


如果唔肯定係咪應該堅持立場,可以搵同事傾下,問下佢哋:你嘅要求係咪合理?佢哋有冇同樣嘅感受? 如果佢哋都認同,咁就代表唔係得你一個,呢個可以增加返你同老細「抗議」嘅信心!


做嘢還做嘢,絕對唔應該容許自己受到任何人嘅惡劣對待。如果佢哋根本唔肯尊重你同你嘅同事,唔認為人係需要休息、要求24小時隨傳隨到,但OT永冇加人…咁將來呢啲情況都唔會有好轉!


總結,認清自己嘅價值、尊重自己,Set好界限,同埋學識Say NO!如果做到呢3樣嘢,面對衰老細嘅時侯就會容易好多。如果做哂以上都仍然受到不公平對待,咁就要揾個份會被人尊重嘅工,早日散水啦!



36 次查看0 則留言

コメント


bottom of page