有冇試過喺工作上已經主動承擔好多額外責任，但到升職嗰陣就冇份? 或者係升咗職，但人工就冇加過？或者你之前參與過嘅重要Project 而家唔再預你，交咗俾第二個人？或者平時同經理嘅1對1 Meeting 通通喺Calendar消失哂？如果係嘅話，你可能已經經歷緊老細嘅「無聲炒人」(Quiet Firing)。
「無聲炒人」 (Quiet Firing) 係指老細唔再撐你亦唔再理你，旨在迫你知難而退、自動自覺走人。
其實好多公司都有啲暗地裡對付員工嘅陰招，只係好多時侯唔會攤出嚟講。有啲時候，呢啲現象可能只係公司內部有暫時混沌期︰好嘅員工短暫冇咗上級支緩、又冇額外補償，而又多咗嘢做。但更多時候，呢個可能係一個手段，企圖迫員工自己走人。
1. 老細突然挑剔到爆
如果平時同老細相處無大問題，突然間佢開始對你挑剔到爆，小小嘢都要彈做得唔好，就要留意啦！咁嘅情況可能係老細故意對你唔滿意，雞蛋裡挑骨頭咁針對你，增加你嘅無奈同無力感，最終令你知難而退，決定辭職。
2. 同事突然同你保持距離
同同事嘅關係原本好好、不時有傾有講，但如果發現同事(仲唔止一個)突然間同你保持距離，交流只限於公事上而且仲要冷冷淡淡咁。呢個情況好可能係佢地由老細到收到風，故意令你感到被排斥，做得唔開心，最終走人。
3. 老細突然Cut 鐘
呢個現象多數喺服務行業同飲食業，老細陰招突然Cut 你鐘。佢地會突然減你工時，甚至臨時改你返工地點。點解咁做呢？唔止可以慳人工，仲可以令你覺得自己唔被需要，呼之則來揮之則去，最終搞到你士氣低落而自己走人。
4.工作量突然唔合理增加
如果有一刻你發現好似有一堆唔係你份內嘅工作忽然湧哂入嚟，咁嘅情況要小心啦！呢個可能係老細借此增加你嘅工作壓力，故意令你啲嘢做唔晒，最終令你覺得工作量太大而決定自行辭職。
5. 突然搵你執爛攤子
有啲老細玩針對時，會突然搵你跟最嘥時間、最難搞嘅Project，迫你心理上承受具大嘅壓力，令你做得唔開心，最後搞到你頂唔順，自己諗住轉行。
6. 冇升職、唔加人工
對打工仔嚟講，最明顯嘅需求就係升職加人工。如果老細Quiet Firing，佢就會專登對你嘅需求視而不見，唔升職又唔加人工。咁你嘅工作能力就無從得到認可，加上人工又冇得加，打工仔自自然然就會揾位轉工啦。
Kommentarer