top of page

講辭職老細會點反應?

講真,要辭職真係唔易㗎。就算揾到份新工錢多啲、返工時間短啲,發展機會多啲,都未必個個捨得而家班同事同老細。所以當同佢地講要Quit嘅時候,都要準備好點應對佢地嘅各種反應。


老細會點反應?


大部分時候,班老細都會明嘅,都會保持返專業,即使短暫對公司有啲唔方便,佢地都會理解你離開嘅原因,尊重返你嘅決定,亦會多謝你對公司嘅貢獻同埋祝你好運。


不過,有啲時侯辭職未必咁順利,老細嘅反應可能會係嬲或者失望。佢地會因為有啲打亂咗做嘢而燥左,又有可能會好快意識到要揾人頂有幾咁難,甚至可能覺得你呢個時侯Quit係對公司不忠。


無論佢地點反應,都要試下平息氣氛。通常呢啲反應都唔會Last太耐,等老細自己明白返唔會因為你走咗而世界末日。留意返,如果係直接跳槽去競爭對手,咁就要預咗老細會叫你即刻走。呢個情況可能對所有人都有啲尷尬,要有心理準備。


其他人知道你要走嘅時候,有啲做得唔開心嘅同事可能會突然親近你八卦,撩你講下公司壞話。要遠離呢啲人…職場好細,臨走嘅時候就慳番啖氣唔好講公司壞話啦。


收到老細Counter Offer點算?


有可能老細會試吓留你,氹你話會加人工或者升你職。呢個情況就真係棘手,尤其係如果而家份工唔係特別唔開心,而你都幾鍾意而家班同事嘅時侯。


不過呢啲Counter Offer嘅野,通常都只係老細嘅緩兵之計。並唔係因為老細覺得你變得好有價值,而只係佢地唔想突然間冇咗你而搞到做嘢亂哂籠。


好多人接受Counter Offer留低,最後發現情況其實冇乜點變,結果一年之內又再開始揾新工。所以大部分時侯,對Counter Offer企硬「Say No」,可能已經係最好嘅選擇。


最後提提,辭職前一定要確保有份Written嘅新Offer喺手。千祈咪信啲口頭承諾嘅Offer,因為唔係個個講嘢都認頭…亦千祈咪諗住拎走公司啲機密資料,例如Price List 或者 Client List之類…乖乖咁交返哂Notebook同手機入面啲嘢俾公司啦!



20 次查看0 則留言
bottom of page