而家冇人會諗住一生一世做同一間公司或同一份工。據統計，打工仔平均一生會轉12份工。
留喺一份冇乜出路嘅工太耐，係好多打工仔常犯嘅職業錯誤…啱啱開始返工，仲需要時間摸索下間公司嘅文化，俾自己試下係咪真係鍾意份工，係無可厚非。但到咗某個時機，可能真係要轉下公司先會揾到更多機會。 大家可以定期問下自己幾條問題，睇下係咪仲應該留喺呢份工︰ 1. 而家份工做咗幾耐？
最好唔好做得太短時間，因為見下份工嘅新老細可能會擔心︰請咗你之後係咪一搵到好機會就會即刻走人？喺大部分行業，1年係被視為最低限度嘅就職時間。
如果要提前走人，最好有一個正面嘅理由，咁樣見新工時就應對到任何有關就職時長嘅問題。
2. 仲有冇升嘅機會？
如果知道自己喺一段時間後有得升，咁可能留返喺而家公司好啲。但如果知道自己喺公司已經發揮到最大潛力，咁可能就係時候搵份新工啦。
不過，如果啱啱同晉升機會擦身而過，就好應該開始搵新工，因為老細可能覺得你未夠領導能力、唔知幾時先覺得Ready，咁就唔好嘥太多時間喺一份冇人珍惜同重視你嘅工之上。
3. 有冇簽過任何入職獎勵？
當你簽約嗰陣，可能會有啲入職獎勵，例如公司會幫你俾進修學費或者住屋租金。一般嚟講，呢啲獎勵都會有一個條款，規定要喺公司做滿一段時間先唔駛還。
簽約獎金多數都有類似條款，如果而家嘅僱主幫你俾左學費、租金嘅話，可能就冇得話走就走。
4. 準備好搵份新工未？
喺開始搵新工之前，要確保自己嘅證書同其他技能係夠Update。花啲時間整理你嘅CV，同埋喺開始搵工前多啲同你嘅人脈Network重新聯繫返。
辭職前都應該試下儲定啲備用錢，等自己轉工期間有個保障。亦可以考慮簡化日常生活，等自己可以揀一份壓力少啲嘅工作。
Comments