top of page

6個細節證明「你份工唔對路!」

間公司好差,老細好mean,同事又多小圈子...呢啲好明顯令你知道份工唔對路。不過有時,有啲細節位唔易察覺,

但已經證明份工好大機會唔啱你:


1. 公司有啲不知所謂嘅規矩

例如有人試過公司唔俾喺枱上放多過一樣私人嘢,如果係相,仲要細過5×7寸!成間office要保持整潔。


類似嘅規矩對工作冇咩實質幫助,又令人返工都周身唔自在 ─ 可能係一個證明呢個地方唔正常嘅徵兆。


2. 公司啲系統、環境同工具都好老土

另一啲細微嘅徵兆係公司用埋啲過時嘅溝通方式、或者好舊嘅網站。咁嘅公司文化好可能唔太積極,唔肯去適應環境同進步,所以反映左喺公司嘅科技、工作程序等方面。


過時嘅系統、殘舊嘅裝修同整體環境,顯示呢間公司冇跟上時代,並唔係一個可以長期發展嘅地方。


3. 同同事難以建立關係

唔係話要好friend,但你應該要感到同同事夾到。如果感覺成個team同事都唔啱傾、唔啱氣場,例如你係一個好開心同有能量嘅人,但公司每個人都自己顧自己。你就會感到好壓迫,好似被困喺密閉空間度咁。


即使唔係喺一個表面上好差嘅環境,如果同同事冇乜交流,喺公司就會好難立足,亦唔會做得舒服。


4. 你發現公司好多「大話」

如果公司好鍾意講大話 ─ 例如做假數,或其他唔誠實嘅處事方法,唔好猶疑,要盡快離開!


呢啲「大話」本身已經夠差,但更擔心嘅係呢堆大話背後係隱瞞緊一個更大嘅問題。如果係咁,呢個地方可能比你所知嘅更惡劣!


5. 你出現身體上嘅毛病

你有冇逐漸出現健康方面嘅問題?呢啲都可能係份工帶嚟嘅後遺症。


身體上嘅小小信號,例如:喺返工或者開會前感到焦慮、開始失眠、甚至月經都延遲... 呢啲都係身體提示緊你需要更健康嘅work life balance!


6. 信你內心嘅直覺

最後,相信自己,如果你嘅內心直覺有啲嘢唔對路,就要採取行動。


開始返新工,會好渴望學新野、會因為有新機會而興奮。但如果之後冇耐,幾乎每晚都發惡夢,見到老細嘅來電時會感到一絲恐懼,而份工就變得單調,返工覺得自己好似機械人咁...咁無論份工表面係點,聽吓自己內心,揾過份更啱你嘅工啦。



150 次查看0 則留言

Comments


bottom of page