辭咗職之後，好容易就想炮轟老細，尤其係如果曾受佢精神虐待，或者冇得到公司足夠嘅認同肯定。但係要記住，當同公司有過衝突，講錯嘢始終有機會搞到好頭痕，因為未來嘅公司可能會私底下搵你以前嘅老細，問返佢哋對你工作表現嘅評價，而做Due Diligence嘅人多數傾向企喺管理層嘅立場…所以，直接話俾老細知你有幾咁難受，的確係會帶嚟一剎那嘅快感，但隨後嘅手尾就可能係永恒嘅…

6個辭職時「不能說的秘密」︰

1. 覺得公司好亂!

如果覺得係公司某方面表現成績差，都唔好直接講啦。通常其實老細自己都知公司有咩問題。由你開口講比高層知，佢哋有幾爛幾唔掂，而你自己就跳槽走先，對你冇咩好處。

2. 覺得公司產品質素差!

如果咁講，老細可能會反駁，唔成功係因為你唔夠博命，而唔係佢哋嘅產品或者服務有問題。HR亦通常唔係好鍾意請唔夠忠心嘅員工，第時嘅僱主都可能會懷疑，請咗你之後轉嗰頭會唔會亂講壞話。

3. 豬隊友問題!

唔好講你Quit係因為班豬隊友嘅表現、態度有問題。當未來僱主做Due Diligence嘅時候，佢哋通常會問返其他高層、同事嘅意見。如果你Quit嗰陣嘅言論過激，得罪咗以前嘅同事，咁佢哋就更加有可能話你至拖累團隊嘅黑點。

4. 老細係人渣!

話你Quit係因為你老細人格問題，冇乜用。佢可能真係好乞人憎，但如果有人轉頭話比佢知你咁講，佢對你未來僱主嘅HR講你表現嘅時候就唔方客觀啦。

5. 班Manager唔做嘢!

唔好話Quit係因為個Manager無能，即使係真嘅都好…因為咁講佢，佢只會將任何失敗都賴哂落你度。

6. 份新工爽好多囉!

唔好向其他同事Show Off你即將返嗰份新工啦，唔好話到自己就快好過哂佢哋咁，無謂令人妒忌！識做啲，感激返其他人嘅支持，同埋講返會好掛住同佢哋一齊做嘢嘅時光就OK。

辭職唔代表係時間指點、批評你嘅老細或者隊友，記住要保持正面同睇得遠啲，大部分行業都比你諗嘅細！Quit嘅時候都要保持專業，咁樣就可以日後好相見！