top of page

6大「中伏」搵工建議💢

搵工嘅時侯,好多人都會俾埋啲老新常談但其實係大伏嘅建議!就算係朋友、屋企人、老師甚至專業搵工顧問,好多時佢哋嘅搵工建議可能係出於好心,實際未必幫到手,甚至令你被reject!以下係6個成日聽但其實無助搵工嘅建議,你有冇中過伏?


1. CV應該寫1頁紙就夠?

除非係好有經驗同係行內好出名,否則得1頁紙嘅CV真係未必夠…唔夠俾人知清楚哂你嘅背景同工作能力,如果有需要,其實CV寫2-3頁紙跟本冇問題!


2. 多啲搵Headhunter傾下計就會幫到搵工?

唔好期望同Headhunter啱傾,佢就會偏幫你!佢哋主要工作係幫個client,即係幫班僱主搵人! 雖然話應該同至少1、2個Headhunter建立良好關係。但係,無論你花幾多時間同個Headhunter熟絡,其實只有你嘅背景同資歷咁啱match佢手上份工,佢先會refer你去佢嘅client度。


3. 漁翁撒網式報工,實有份掂?

「漁翁撒網」咁搵工從來都唔Work!唔好嘥自己時間,亦唔好嘥僱主嘅時間啦。最好嘅策略係有選擇性,apply啲真係啱嘅工。專心寫份關聯性高嘅CV同Cover Letter,充份展示返你嘅經驗技能點樣可以幫你勝任呢份工,成功率會更高!


4. 要去Networking Event搵人識?

Networking Event對搵工嚟講多數無乜用,因為參加嘅人大部份都只係想喺人地身上「攞嘢」為主。


不過,如果真係好需要出去擴展下人脈,去到一個Networking Event,就最好Set番個合理嘅目標:每次識1-2個人,花時間深入去了解對方。同時,盡量直接搵僱主傾下,介紹返自己,了解返有咩Position,睇下有冇得Referral同其他潛在嘅機會。


5. 有得見工就去咗先,當練下膽都好?

如果對份工「十五十六」緊,咁去Interview了解多啲都冇問題,話唔定有驚喜。但係如果肯定唔會Take呢份工,就唔應該去面試啦。只係為咗練習下而走去面試,其實Interviewer都會好易睇穿你嘅意圖,分分鐘會同Headhunter投訴你浪費時間,影響你之後嘅機會!


6. 搵返有興趣嘅嘢做?

興趣呢樣嘢,其實大部份人嘅都會隨住唔同人生階段而轉變。要搵到自己嘅興趣只有一個方法,就係不斷試下新嘢。講真,如果未試過做平面設計師、財務分析師或者銀行家,又點知自己冇興趣呢?到最後,可能會發現自己鍾意嘅嘢好多,唔需要畫地為牢。同時,當你喺自己嗰行變得越嚟越熟手同成功個陣,你對嗰行就自然會越嚟越有興趣同熱情!








31 次查看0 則留言

Comments


bottom of page