揾工嘅過程，有時HR會要求你提供Reference同埋會Reference Check你。呢啲時候通常代表間公司真係對你有興趣，想睇下你係咪啱公司。高質嘅推薦人呢啲時候就可以幫你證明你嘅資歷同技能。所以，一份推薦人名單(List of Job References)，絕對值得花啲時間去準備。
1. 搵邊個問Reference？
以前嘅老細、同事、客戶、供應商同埋同事，都係好適合嘅專業推薦人。大學教授、一齊做義工嘅人，亦都可以係高質嘅推薦人。搵啲你知會俾正評你嘅人，同埋，盡量揀啲可靠嘅推薦人，最好係你知會準時覆HR Reference Check嘅人。
2. 點樣問Reference？
問Reference嘅最好方法係：「你覺得你對我做嘅嘢，有冇熟到可以做我推薦人？」或者「如果俾份好嘅Reference我，你會唔會都OK？」咁樣可以確保答你「可以」嘅人都會幫你寫份正面嘅Reference。當有人同意做你嘅推薦人之後，就要將所需嘅資料俾佢哋：
將份最新嘅CV俾佢哋
話俾佢哋知你想搵嘅係咩工，咁佢哋就知應該突出你咩技能同經驗。
如果你知間公司會聯絡你嘅推薦人，就將呢份工同公司嘅資料俾埋你推薦人。
如果你需要封特定嘅推薦信，就同你推薦人講清楚邊度交信，同埋截止日期幾時。
好多公司唔太睇書面推薦信。佢哋通常會打電話或者Email同你嘅推薦人溝通。不過，如果有啲公司係要推薦信嘅，準備定幾封都冇壞。如果你就黎畢業或者離職，你可以請老細寫定封推薦信比你。咁就可以趁佢對你嘅工作仲係記憶猶新嘅時候寫信。
3. 獨立準備List of References
搵到班推薦人之后，就要獨立整份List of References，記得要同CV分開！Interview嘅時候，交份Reference List俾HR睇。List入面應該有3至4個References，同佢哋嘅職位、公司同埋聯絡資料。
4. 你係可以Say No嘅!
HR聯絡你嘅推薦人之前，應該會先問准你嘅同意，不過唔係所有人都會咁做。如果你唔想佢地聯絡你而家嘅老細，你完全可以話唔方便。尤其係你仲番緊而家份工嘅時候，唔會想喺Interview個陣，Interviewer突然Call你而家嘅老細去Reference Check。所以，都記得準備定多份後備嘅Reference List啦。
