1. 散水前1個月︰計好Last Day先遞信
辭職時機呢個好緊要！要通知1個月先可以辭職，基本上你嘅Last Day就係你遞信嘅一個月之後。但如果你仲有未放嘅年假，可以試下同老細傾下，睇睇佢係咪可以俾你用年假代替返工，提前Last Day，咁樣你就可以喺番新工之前放多幾日假。如果你有未放嘅年假，而老細又希望你堅持到底，咁就唔好夾硬爭取，可以考慮將假期轉成錢，既和氣又有益。
2. 散水前2星期︰Reference Letter
第一次辭職定係經驗豐富都好，都可以喺辭職信尾段提到「希望喺離職前可以拎到一封Reference Letter」。
提出拎Reference Letter嘅時機喺辭職後約1至2星期，點解呢？因為呢個時候老細已經消化你要離開嘅消息，比較容易開口問。呢個時候可以問下老細可唔可以幫你寫封Reference Letter，千祈唔好等到最後1星期先做，老細忙到爆，唔一定即時有時間處理。而且開口要求Reference Letter嗰陣要用誠懇嘅態度，唔好當成理所當然，而係一個禮貌嘅請求。
3. 散水前1-2星期︰工作交接
離職都想要保持個好形象，同老細同上司有個完美結束。前1-2星期可以開始準備工作交接喇，同自己team傾下，睇下佢哋對工作交接有冇啲特別意見，定或者已經搵好左個後備。
然後，你可以按佢哋嘅指示，將手上嘅工作一一列喺文件度，最好用Excel表格寫出已經完成嘅工作同埋完成日期，標明邊位同事可以搵到相關嘅文件、需要跟進嘅工作係由邊個負責，同埋而家嘅進度係點樣。最好喺同事嘅會議度再講一次工作交接嘅事，或者Email通知佢哋，留低個Record。
4. 散水前1星期︰整走私人嘢
可能過咗咁多年，公司已經變成你嘅第二個屋企，私人嘢喺公司嘅每一個角落都有。當你離職嘅時候，記住要帶走你所有嘅私人嘢。唔單止係你個工作位度嘅嘢，你電腦入面嘅個人資料同檔案都唔好漏。平時同朋友之間用嘅通訊軟件嘅吹水History，甚至電腦入面儲存嘅各種賬戶（包括個人Email、Facebook、Skype等等）嘅Password，都要Delete哂，唔好留左比下手。
5. 散水當日︰派散水餅+記得留個「keep in touch」嘅方式
「今日留一線，他朝好相見」，無論點都好，都要留個後路。Last Day準備好散水餅請同事食，再喺講ByeBye嘅Email度講聲「多謝你哋嘅幫手、包容同體諒」，仲要留個你嘅Contact方法，好似WhatsApp、電話號碼咁，令人感到「仲會有下次」嘅感覺。話唔定，未來有日你老細可能會為你度身訂造一個頂級嘅工作環境同條件，再叫你番去呢!
