好多專家都話,講咗辭職之後又轉軚留 番低,通常都係唔明智嘅。Harvard Business Review就有份報告話,近40% 嘅高層同HR認為,接受Counter Offer留 低會對你嘅Career有壞影響。
佢哋會覺得你始終有隨時走人嘅風險，對你嘅忠誠會有質疑，亦可能會危及將來嘅晉升機會。一旦有個有心機嘅新人出現，你被炒魷嘅機會就即時大。而且，同意留低，然後無耐又走，好可能會斷絕你同公司嘅關係。
不過，話就咁話，78%嘅高層同80%嘅HR又話，接受Counter Offer留低有時都有道理嘅。
老細留人點算好?
老細可能會用加人工、升職、放多啲假、番工時間彈性啲等等嚟勸你留低。首先，人哋說服你留低嘅時侯要好小心，唔好咁易答應。
聽下老細講乜? 畀機會老細解釋下佢為咩想你留低。咁做幫你哋嘅討論Set個互相尊重嘅Tone之余，仲可以聽到老細講點解你對公司咁重要，呢啲資訊對將來嘅Interview都好有用！如果唔係因為有更好嘅Offer辭職，就聽下老細講乜，再判斷係咪仲值得留低。
不過，如果老細態度好強硬，就唔怕重申多次你已經決定咗要走。你冇責任一定要留喺呢份工，亦都唔需要對自己嘅決定有罪疚感。你有你嘅自由，老細冇權迫你留低。
努力保持冷靜唔好嬲 如果老細唔聽你講，或者近乎施壓迫你留低，咁嘅情況真係好煩。不過，都要控制住自己情緒，記住，呢個唔係私人嘅關係，大家都係專業嘅。如果老細繼續嘈，準備返一句簡單終極嘅回應：「我明你對我離職有顧慮，但我已經決定咗，我嘅Last Day會係(日期)。麻煩話我知，Last Day之前我可以做啲咩令過渡順利啲。」
唔駛解釋咁多 唔需要同老細過份解釋你走人嘅原因。如果你100%決定咗要走，就應該避免講太多點解要辭職。仲有，記住唔好講任何老細或者公司嘅壞話。如果有人問起你嘅決定，就講一個敷衍啲嘅解釋：「我想轉行發展」、「我想試下其他行業」。
唔駛講新工嘅詳情 老細可能會八下你份新工嘅詳情，想知點樣留你或者其他公司有咩優勢，但你冇義務講佢知。如果老細迫你講具體細節，e.g. 新公司人工幾多，就試下轉移話題︰「我同意咗唔公開得呢啲資料」或者簡單啲講：「我哋而家仲喺最後商確緊。」
如果你已經Accept咗另一份Offer，或者而家仲同其他公司Interview緊，小心唔好俾老細留你影響到！被留、被高度重視，聽落好似好正，但記住，最好唔好帶住舊包袱去搵新機會，亦唔好令未來僱主擔心你可能會揀留喺舊公司。
