推薦信vs工作證明 【辭職Reference Letter】

當你揾工搵到個好Offer，點知就係因為一封信出事…呢封推薦信，對好多求職者黎講都好重要! 有人一切都準備好，就係等到Interviewer問到先知自己差呢封信。有啲人就唔記得問返以前嘅老細寫，但更多人其實唔明呢封信有咩用。

推薦信同工作證明有咩分別？

離職時公司俾你嘅文件可以有2份︰

1. 推薦信(Reference Letter)

2. 工作證明(Letter of Employment)

Reference letter係幫你寫你做咗咩好嘢嘅證明。而Letter of Employment就係俾你一紙證書，證明你係某間公司打過工，只係會寫你嘅職位同日期，唔多唔少。

不過，係你搵工嘅時候，HR可能兩封信都會要求你出示。另外，呢兩封信都唔係僱傭條例規定必須發出嘅文件。即係，公司出俾你係人情，唔出俾你都冇得追討。

Reference Letter嘅5個重點：

1. Reference Letter係由打工仔請熟悉佢工作表現同關係好嘅人寫，通常係Supervisor。佢嘅內容比Letter of Employment「軟性」好多，會講返你嘅工作能力、態度、個性等等，俾你下一間公司參考。所以Reference Letter又叫做推薦信，就係想表達佢推薦你嘅意思。

2. 為咗保險起見，最穩陣就係預備兩封辭職Reference Letter，一封搵啱啱離職嘅公司嘅上司寫；另一封就搵你再上一份工嘅主管寫，最好就近期啲，唔好太耐之前。

3. 如果同阿頭關係唔好，即使佢肯幫你寫Reference Letter，可能都會寫得唔靚。但如果你仍然想有封推薦信，可以搵同一個Team嘅Supervisor，或者其他合作過又關係好嘅Team Head幫幫手。

4. 如果搵唔到適合嘅人寫辭職Reference Letter，都唔好自己亂寫…因為用虛假文件係刑事罪嚟。如果你因為被炒、同上司唔夾或者同前公司有衝突而冇Reference Letter⋯⋯不如勇敢同HR、未來僱主坦白講，或者搵啲唔需要推薦信嘅工作，都好過造假。

5. 大機構請人，其實會執正嚟做，佢地多數會請第三方嚴查。即使係一般公司，都會用簡單直接嘅方法，例如打個電話去問求職者嘅前上司，去驗證CV上嘅資料係真定假。

Letter of Employment嘅3個重點：

1. 要證明你係某間公司工作過︰職位、入職同離職日期。

2. 呢份文件通常由HR發出，最好你辭職嘅時候同HR講定，叫佢哋幫你準備好，最後一日嚟拎，乾淨利落。萬一HR太忙，你離開左公司先搵佢哋補發，咁就搞到自己同人地都煩。

3. 如果HR唔願意出工作證明，或者擔心工作證明寫明你係被炒…你仲可以用合約、糧單同強積金紀錄嚟證明你真係某間公司做過。