每個月都有好多人辭職，老細可能會問番點解Quit，而未來嘅僱主亦都可能好想知點解。某啲Job Applications可能會要你寫番離職原因。而喺Interview，HR可能會問你點解Quit上份工? 所以搵工嘅時候，最好先諗清楚你要講乜。有好多合理嘅原因可以解釋，唔理你辭職嘅原因係乜，最緊要Make Sure係正面嘅。
10大最爛嘅辭職原因 有啲原因即使係真都好，都唔應該用嚟做解釋。講出口會損害形象，聽到Interview班HR滿腦問號：
「我屋企、親戚叫我辭職。」
「我Feel到差唔多被炒。」
「呢份工番工搭車超難。」
「我喺度做嘢做到好悶。」
「我同啲同事唔Friend。」
「我Feel到老細好憎我。」
「而家呢間公司超差。」
「而家呢份工太難做。」
「呢份工成日要OT。」
「我唔鍾意呢份工嘅番工時間。」
合理啲嘅辭職原因
1. 出現更好嘅機會 有時候，好機會話黎就黎，或者你想轉個生活方向。可以講：
「貴公司嘅名氣好大，機會都好好，如果比我揀，我絕對會即刻離開而家份工。」
「以前個份工係Part Time，而家想揾份Full Time嘅工。」
「我想尋求新嘅挑戰。」
「如果有份工可以比多啲責任我，我會有滿足感好多。」
2. 份工唔太啱 有啲時候，份工可能唔夾你嘅專業目標：
「之前份工個職位同我嘅Career Goals唔太Match。」
「我想揾份更啱我教育背景嘅工。」
「我離開係因為想轉行去做另一個行業。」
「我之前份工發展機會好少。」
「我覺得而家個崗位我已經發展到盡頭，而家想搵新嘅發展機會。」
3. 公司重組 公司內部有困難，可能係Quit嘅訊號。如果因為公司內部變動，可以講：
「我做緊間公司有啲好大嘅變動，我哋Team嘅士氣同Productivity都跌咗唔少，所以我覺得係時候搵新出路。」
「公司Cut Budget，我而家Team人只剩番原來嘅1/3。」
「公司縮減咗我哋嘅Work Hours，我需要份Full Time嘅工。」
「公司重組，Shut Down咗成個Department。」
4. 家庭狀況 份工好緊要，但係生活仲有好多重要嘢。家庭或者健康問題係離職嘅常見原因。唔需要太詳細講：
「之前屋企有人病咗，我要全職去照顧。」
「因為之前屋企嘅狀況，我無得唔離開我當時嘅職位。」
「之前份工時間表唔夠彈性，而我需要照顧我嘅細路。」
