職場時代變咗，但打工仔嘅辭職理由都係一樣無乜點變：無加薪、無晉升、上司唔識嘢仲好惡頂、人事鬥爭又至死不休！呢啲都係好多打工仔辭職嘅真正原因。不過研究發現，辭職講真心話嘅人真係唔多。大部分人都會用各種花巧手段包裝自己真正嘅辭職理由，因為留後路係對自己有好處嘅。今日留一條線，他朝好相見，冇必要一場Exit Interview搞到申訴大會咁。
之前有間Consulting Firm就企業員工流失做咗份研究調查，結果發現，員工有以下5大嘅辭職理由：
升職夢碎
工作壓力大到爆
努力付出都冇人認同
同直屬上司唔合拍
辦公室政治鬥爭太激烈
就算呢啲係真正嘅辭職理由，但絕大部份人Quit嘅時候，都唔會講出真相。即使去到Exit Interview，好少人會對HR傾自己對公司嘅不滿，特別係涉及上司同同事嘅問題，都唔會喺度攤開講，因為怕萬一日後要求Referral Letter嘅時候會俾舊上司玩。
辭職都要有禮儀㗎，報復嘅指控冇好處。Exit Interview嘅時候，大部分人都會將辭職理由美化返，希望保持和好關係！而最受歡迎嘅「得體」原因，通常都可以用「自己」做藉口，例如︰
「想多啲時間俾自己同屋企人，多啲Work Life Balance。」
「想喺Career Development方面，俾自己個New Challenge。」
「透過新嘗試，希望可以磨練自己嘅能力，例如Management Skill。」
咁樣講就得體啲啦！如果可以加埋實際例子同數據，嚟證明自己點樣處理咗不同的工作量，咁樣唔單止可以顯示你唔係逃避責任，仲可以係一個同公司有建設性嘅溝通方式。比起報復指責老細有問題嚟講，呢個方法更積極，亦更符合辭職嘅禮儀。
