當你遞左信後，仲有一個月先走得，但Last day越來越近，你可能會開始潛意識放鬆，無意中做左啲野影響老闆、同事同客戶對你專業嘅評價。
唔想臨走先失守留底個壞印象，以下10個Dos & Don'ts，喺辭職通知期內要特別留意！
1. 專心執埋啲手尾
你嘅首要任務係完成進行中嘅工作項目，同好好傳遞埋手頭上嘅工作。唔好等到最後一日、甚至最後一分鐘先搞掂。整理好自己張枱，將未完成嘅事交俾可靠嘅人處理，顯示即使你唔再係度做，都仍然關心公司。
2. 通知返你嘅職場網絡
通知返你經常合作嘅客戶、商業夥伴同埋同事，咁佢哋就唔會俾你離職搞到措手不及，其他同事接手嘅時候可以少啲麻煩。
3. 保持專業
有時有啲公司，當你辭職後，上司、同事可能會變得冷淡，唔再咁主動揾你參與討論或者其他社交活動。要有心理準備，如果咁嘅情況出現，雖然唔太好受，但要記得保持專業。
4. 保持正面
辭左職真係會好想一次過將所有對公司嘅不滿講哂出嚟！如果有人問你點解要quit，唔好忍唔住數落公司嘅缺點呀... 專注喺好嘅事上，將唔順意嘅嘢忘記啦，反正你都好快走人！
5. 留低條後路
除非你真係無得揀，唔好斷自己後路。個職場好細，你永遠唔知幾時會再次同老闆、同事碰面。留低條後路等未來有機會再一齊做嘢，係明智嘅選擇。
6. 唔好太高調
雖然係應該通知返合作開嘅人你要離職，但唔使「打羅打鼓」週圍講。遞信後保持低調，你嘅老闆、同事會更加尊重同欣賞你。
7. 唔好當係放假
可能喺你最後幾個星期，工作量會少啲，但唔代表你可以返住工睇youtube 或者上social media。自己搵啲有用嘅嘢做，問下老闆同隊友有咩可以幫手，佢哋會多謝你嘅體貼同團隊精神。
8. 唔好咁得意忘形
如果份新工正好多、人工高、福利好，你可能會好想同人開心分享，但你要忍住唔好同同事講啊！喺過渡期間，保持辦公室嘅正能量，減少自己辭職帶嚟嘅干擾先係最重要。
9. 唔好留底個壞名聲
好多行業真係好細，消息傳得好快。正如上面所講，睇遠啲，放眼喺未來嘅機會。之前唔鍾意嘅人事就盡量放低，握下手和解，用友好嘅姿態離開啦。
10. 唔好忘記講再見
記得要留時間同你工作嘅所有人好好咁講一聲再見。準備啲散水餅，感謝佢哋嘅支持同指導，交換聯絡方式，以正面嘅方式離開。